i.pianista : 意大利奧地利之旅 Day 4

2013年9月20日

今日是Henry第一場計時單車賽（Time Trial），地點在意大利北部小城市Trento的衛星小鎮Cavedine。

地圖顯示有巴士去，只需半個鐘左右，所以即使大會有shuttle提供比運動員(運載單車)同親友，我都自己搭巴士去。一來大會收得貴，二來朝早11點幾就要出發，但Henry下午四點先比賽，去到豈不是要呆等數小時？不如在Trento四圍逛，食完lunch再自己坐巴士去。沿途也可以欣賞風景~

這裡每個鎮的邊界都有指示牌。留意入和出有甚麼不同--

(多得Google map提供極好用的street view功能)

<誰知道。。。>

當我去買巴士票時，售票阿叔話因為單車賽，唯一出入Cavedine的路封左，到下午四點半先重開。哎呀，乜真係好似鄉村咁，成條村得一條路出入！阿叔話下一班巴士4:10pm才恢復，中途還要在某鎮轉車。我心裡盤算著，Henry4pm開始比賽，4:30pm應該完成，但巴士4:50pm才到已經遲哂啦。不過一場來到，即使睇唔到比賽，我都想去跟他會合支持吓，順便當遊覽都好。但再想，這裡是意大利! 這幾天裡已感受到“規條”同“實際情況”可以有好大落差。我怕中途在那些小鎮轉車有甚麼突變，又或者去到Cavedine下車後迷路就叫天不應叫地不聞。而且不是遊客區的意大利人多數不會講英文的。雖然情況不樂觀，但我仍在繼續想坐巴士去的可行性，難得Henry參加這個盛會，意義重大嘛! 不過當想到回程的時間就甚麼火也熄滅，因為只得一班車在7pm開出，而比賽的人在5-6pm中間都應該回去了。得我一個人暗暗的黃昏中在山卡拉小鎮等一架唔肯定有無同幾時開的巴士？？旅行要歷奇都唔使咁嘅... 行程泡湯心情當然失落，我們老遠來到就是為了這件事呀！唯有等過兩天看最後一場賽事了。(哪知當日又有事故差點看不到。。。待續!)

接受去不到觀看比賽的事實，那麼還有半天搞甚麼好呢？突然想起第一天在酒店食早餐時，一個年輕的伙記同我哋提過北面有一個距離車程45分鐘的城鎮叫Bolzano，他經常去那裡購物。我心想一個後生仔會去嘅地方都應該都唔會悶得去邊吧，現在還不是個好時機去那裡行一轉？原本今晚做資料搜集，明天才去Bolzano的，但如果現在趁有半日時間，去完發現無咩特別，咁聽日就可以去第二道啦嘛! 成個人突然爽一爽，去唔到Cavedine的失落感傾刻完全消失！於是一支箭衝去隔離的火車站，看看幾點有車，跟著人龍排隊買票。當排到我時，我心想現在縮沙還來得及，因為完全無準備之下，去一個陌生城市感覺總有點冒險。但市集通常在火車站附近，應該唔難搵的！不消10分鐘，我就買了票站在月台等車。一個十分即興的行動，感覺是驚喜--又驚，又喜! 等候期間有一架懷舊火車駛過呢!

<意大利的火車時間表> 在Trento等車時，先看定回程車的時間表。Bozen是Bolzano的德文叫法。稍後解釋為何用兩種語言。

<探秘的感覺>

阿爾卑斯山在意大利北部開始，火車越向前行山形越高聳。

火車每秒在高速向北進發，我心在想"我去緊邊？我會唔會返唔到去？"

一路都見到好多種葡萄的田，應該都是釀酒用的。

＜迷中找路＞

Bolzano落車後，街道繁忙，不知該向哪方行。見有條街好似比較多人就向那邊進發。行了不遠有間酒店，靈機一觸立即拐個彎入去。。。找免費地圖。: P 剛巧有堆日本遊客（很驚訝，這些偏遠地區不是亞洲遊客熱門遊覽地點）我又順勢去櫃臺問點去shopping區。成功！

(Bolzano在第一次世界大戰前屬於奧地利的，所以文化和建築都充滿德奧式設計，official語言都是德意雙語，是個很獨特的地方)

<有眼不識泰山> 在地圖上見有個中世紀的城堡物體，值得一看。看似步行5分鐘左右便到，但跟著條街行了15分鐘都未見！無理由的，城堡應該好大座又點會miss啊。無可奈何下唯有回頭。回到一半路才發現，咦！乜呢座"apartment"個頂部同地圖畫嘅城堡頂咁似嘅！呀車～～～原來呢座就係中世紀城堡，一早經過也不知道添！Tiny castle~~